Job 5

1Ona una oraoro, to ia bar na torom ta ra nilaim?
Ma nuve vang ta ra umana angelo una matoto tana?
2A kulot i vakaina ra papaua na tutana,
Ma ra varpin i doko nina i tuptup.
3Iau ga gire ra tuptup na tutana i ga okor,
Ma iau ga tata vakaina lulut ra kubana.
4A umana natuna dia ki na malari,
Di ki taun diat ta ra mataniolo,
Ma pa ta na i ki pi na maravut diat.
5Diat dia mulmulum dia en vue kana umauma,
Dia tak vue nam ba i tavua livuan ta ra umana kait bula,
Ma diat dia mar dia anan upi kana tabarikik.
6Tago ra varmonong pa i vana rikai ta ra tobon,
Ma ra purpuruan pa i gol rikai ta ra pia;
7Da ra pitil na iap i pitil tutua,
Damana di kava ra tarai upi ra kini na malari.

8Ma iau, gala ina lingan tadav God,
Ma ina nur tar kaugu kini tai God;
9Tago i papait ra umana ngala na magit nina pa da kapa tana,
Ma ra umana magit na kinaian nina dia peal mat;
10I tul tar ra bata ure ra gunagunan,
Ma ra tava i alir tavit ta ra umauma;
11I vangala ra umana luveana,
Ma i tul tar ra varvalaun ta diat dia tabun.
12I tur bat ra umana tena vakikiu,
Kari ra lima i diat pa i pait valar pa ta magit.
13I kinim vake ra umana tena kabinana ta kadia vavagu iat,
Ma i vapar vue ra nuknuk i nina i gegagege ra maukuana.
14Dia vartadav ma ra bobotoi ba i keake ka boko,
Dia pa tupatupa ba ra keake i ki tur, dari ta ra marum.
15I valaun pa ra umana biluana kan kadia pakat na vinarubu,
Ma ra umana biaui kan ra lima i ra umana rangrang na luluai.
16Damana ra umana luveana dia nuknuk ung,
Ma di paum bat ra ngie i ra lavur kaina magit.

17Ea, nina ba God i vapagumanena i ti doan;
Damana koko una pidimuane ra varpit kai ra Dekdek Muka.
18Tago nina ba i tar kita vadala, i pulu ia bula;
Ma nina ba i tar ubu vakinkin ia, a limana i valaun pa ia.
19Laptikai na pakana i valaun u kan ra kini na malari,
Maia, lavurua na pakana ra kaina pa na tadav u.
20Ta ra e na mulmulum na valaun pa u kan ra minat,
Ma ta ra e na vinarubu kan ra pakat na vinarubu.
21Una ki bakit kan ra tinata kakaina,
Ma pa una burut ba ra bung na vinirua i vut.
22Una nongone ra vinirua ma ra niiba,
Ma pa una burutue ra lavur leing ta ra gunagunan.
23Avat a bartalaina ma ra umana vat ta ra uma,
Ma avat a ki na varmaram ma ra lavur leing ta ra pupui.
24Una nunure ba ra kubam i tur langalanga,
Ma ba una vana tadav kaum kikil na sip, pa ta magit na rara tana.
25A umana natum diat a peal,
Ma ra umana bul mur tam diat a da ra mapmapina vura.
26Una tadav ra babang na minat ba i lolokon kaum kilala na nilaun
Da ra vinvin vit ta ra e na nidodoko.
Go parika ave tar tikan tadav ia, ma i dovot;
Una valongore, ma una kodop vake ta ra balam.
27

Copyright information for KSD